«Այբ» ակադեմիան նախաձեռնել էր դասընթացավարների զարգացման ծրագիր
«Այբ» կրթական հիմնադրամը՝ որպես կրթության գերազանցությանը ձգտող կառույց, կարևորում է ուսուցիչների և տնօրենների կարողությունների զարգացումը և ապահովում նրանց վերապատրաստող մասնագիտական թիմի շարունակական կրթությունը՝ հիմնվելով առաջատար փորձի ու ժամանակակից պահանջների վրա: Հենց այս նպատակով էր «Այբ» ակադեմիան նախաձեռնել դասընթացավարների (վերապատրաստողների) զարգացման ծրագիր, որն իրականացրեց EVINAUX ընկերությունը։
Որակյալ ուսուցումը պահանջում է ոչ միայն մասնագիտական գիտելիքներ, այլև մեթոդական հմտություններ և առաջնորդական կարողություններ։ Ծրագիրը համադրում էր դասընթացների կառուցման, դրանց արդյունավետ մատուցման և մասնակիցների ներգրավման լավագույն մեթոդները և հիմնված էր գործնական վարժությունների, վերլուծական քննարկումների և իրական դասընթացային իրավիճակների մոդելավորման վրա։
Ծրագրում ներառված էին 14 մասնակից, ովքեր հնարավորություն ունեցան ոչ միայն ուսումնասիրելու նոր գործիքներ ու մեթոդներ, այլև դրանք անմիջապես փորձարկելու՝ կառուցելով և վարելով իրենց սեփական դասընթացները։
Չորսօրյա ծրագիրը շեշտը դրել էր դասընթացավարի հմտությունների զարգացման վրա և ներառում էր հետևյալ կարևոր թեմաները.
- Ուսուցման հոգեբանությունը և մեծահասակների ուսուցման առանձնահատկությունները,
- Դասընթացի կառուցման հիմնական տարրերը,
- Մասնակիցների ներգրավման տեխնիկաները,
- Դասընթացի գնահատման մեթոդները,
- Դժվար իրավիճակների կառավարման և հաղորդակցման հմտությունները։
«Դասընթացի արդյունքում իմ մեջ ձևավորվեց բոլորովին նոր պատկերացում վերապատրաստողի դերի մասին. գրեթե ցանկացած թեմայի շուրջ հնարավոր է կառուցել շատ ներգրավող և տարբերվող ուսումնական դասընթաց, եթե այն մանրամասն պլանավորես՝ հաշվի առնելով ամենաչնչին մանրուքները, նախապես ուսումնասիրես լսարանի կարիքներն ու ակնկալիքները և թիրախավորված կիրառես համապատասխան գործիքներն ու մեթոդները»,- պատմում է դասընթացի մասնակից, ԱԲ ծրագրի մշակման բաժնի ղեկավար Անահիտ Հարությունյանը։
Նոր գիտելիքների ու գործիքների ուսումնասիրմանը զուգահեռ՝ մասնակիցները ստացան նաև հետադարձ կապ՝ իրենց ուժեղ կողմերը գնահատելու և բարելավման ուղղությունները հստակեցնելու համար։
Ակադեմիան շարունակելու է ստեղծել գիտելիքի փոխանակման նոր հարթակներ և խթանել կրթական մեթոդների կատարելագործումը։