«405» կրթական դաշինքը «Այբ»-ում
Հունիսի 9-ին «Այբ» կրթական հիմնադրամը հյուրընկալել էր «405» կրթական դաշինքի անդամ կազմակերպությունների ներկայացուցիչներին։ Հանդիպումը մեկնարկեց «Այբ» դպրոցում շրջայցով: Մասնակիցները հնարավորություն ունեցան ծանոթանալու դպրոցի կրթական միջավայրին, ուսումնական և ստեղծարար տարածքներին, ինչպես նաև «Այբ»-ի կրթական փիլիսոփայության գործնական դրսևորումներին։
Շրջայցից հետո մասնակիցներին ներկայացվեցին «Այբ» կրթական հիմնադրամի գործունեության հիմնական ուղղությունները, կրթական ծրագրերը և զարգացման տեսլականը։
Ներկայացվեցին նաև «Այբ» դպրոցի գործունեությունը, մասնավորապես՝ դպրոցում ուսուցանվող «Արարատյան բակալավրիատ» կրթական ծրագիրը, ինչպես նաև Դիլիջանի կենտրոնական դպրոցի փորձը և «Այբ» ակադեմիայի՝ ուսուցիչների մասնագիտական զարգացման ու կրթական առաջնորդության ծրագրերը։
Առանձին անդրադարձ կատարվեց նախագծային ուսումնառությանը՝ որպես աշակերտակենտրոն կրթության կարևոր բաղադրիչի, որն օգնում է զարգացնելու սովորողների համագործակցության, խնդիրների լուծման և ստեղծարար մտածողության հմտությունները։
Հանդիպման ավարտին մասնակիցները հնարավորություն ունեցան քննարկելու կրթության ոլորտի արդիական մարտահրավերները, փոխանակելու փորձ և մտքեր, ինչպես նաև նախանշելու հետագա համագործակցության հնարավոր ուղղությունները։
Միջոցառումը ևս մեկ հնարավորություն էր ամրապնդելու կրթական համայնքի տարբեր դերակատարների միջև կապերը և խթանելու համագործակցությունը՝ ի նպաստ կրթության որակի շարունակական զարգացման։