«Կրթության կառավարում և առաջնորդություն» վերապատրաստման ծրագրի նոր փուլի մեկնարկը
Հայտարարում ենք «Կրթության կառավարում և առաջնորդություն» վերապատրաստման ծրագրի նոր փուլի մեկնարկի մասին։ Ծրագրի նպատակն է հաջորդ սերնդի դպրոցի առաջնորդների հզորացումը՝ նպաստելով տնօրենների թափուր հաստիքների համալրմանը Հայաստանի ավելի քան 300 դպրոցներում։
Վերապատրաստման մասնակիցները հնարավորություն կունենան հմտանալու դպրոցի զարգացման ծրագրի մշակման և դրա որակի գնահատման մեջ, զարգացնելու կրթական կառույցի ռազմավարական կառավարման գիտելիքները, հմտությունները և ունակությունները։
Հրավիրում ենք մասնակցելու բոլոր այն անձանց, որոնք՝
- բավարարում են «Հանրակրթության մասին» օրենքով սահմանված կարգով հանրակրթական ուսումնական հաստատության տնօրենին ներկայացվող պահանջներին,
- ունեն հանրակրթական ուսումնական հաստատության ղեկավարման իրավունք (հավաստագիր) կամ նախատեսում են հավաստագրման գործընթացում ներգրավվել մինչև ս․թ․ սեպտեմբերի 30-ը,
- նախատեսում են դիմել ներկայում տնօրենի թափուր հաստիքի համար:
«Կրթության կառավարում և առաջնորդություն» վերապատրաստման ծրագիրը մշակվել է «Այբ» կրթական հիմնադրամի կողմից, հարստացվել «Այբ»-ի միջազգային գործընկերոջ՝ Լոնդոնի համալսարանական քոլեջի Կրթության ինստիտուտի (UCL IOE) հետ համագործակցությամբ և փորձարկվել 2024-2025 ուսումնական տարվա ընթացքում՝ ՀՀ ԿԳՄՍ նախարարության և ՅՈՒՆԻՍԵՖ-ի հետ համատեղ։ Ծրագրի մասնակիցների արձագանքին ծանոթացեք այստեղ։
Ծրագրի նոր փուլը ֆինանսավորվում է «Հ. Հովնանյան» ընտանեկան հիմնադրամի կողմից։
Վերապատրաստումը մեկնարկելու է հոկտեմբերին և տևելու 7 ամիս: Այն անցկացվելու է երկու խմբով՝ 30-ական մասնակցով, և հիբրիդային եղանակով՝ առկա և առցանց հանդիպումներով: Առցանց հանդիպումները նախատեսված են շաբաթական մեկ անգամ: Առկա հանդիպումները տեղի են ունենալու Երևան քաղաքում 4 անգամ՝ յուրաքանչյուրը 3-օրյա տևողությամբ:
Վերապատրաստման ծրագրին մասնակցությունն անվճար է: Առկա հանդիպումներին մասնակցության նպատակով ճանապարհի և կեցության ծախսերը հոգում են մասնակիցները։
Վերապատրաստման ծրագրի մասնակիցներին ընտրելու է «Այբ» կրթական հիմնադրամի ձևավորած հանձնաժողովը:
Ծրագիրը բարեհաջող ավարտելու և ավարտական աշխատանքի՝ ծրագրի պայմաններին համապատասխանելու պարագայում մասնակիցները կստանան ավարտական փաստաթուղթ։
Վերապատրաստման ծրագրին մասնակցելու համար թեկնածուները պետք է լրացնեն էլեկտրոնային հայտադիմում՝ անցնելով այս հղմամբ։
Հայտադիմումին կից պետք է ներկայացնել՝
- ինքնակենսագրական,
- հանրակրթական ուսումնական հաստատության ղեկավարման հավաստագիր (առկայության դեպքում) կամ հավաստագրման գործընթացի մեկնարկումը հավաստող հիմք։
Հայտերն ընդունվում են մինչև 2025 թվականի հուլիսի 31-ը՝ ժամը 18։00-ն։ Հարցազրույցի կհրավիրվեն միայն ընտրված թեկնածուները:
Հարցերի դեպքում գրել [email protected] էլհասցեին: