Առավոտ լուսո. Մերի Հովսեփյան, Անահիտ Հովհաննիսյան
«Առավոտ լուսո»-ի տաղավարում «Այբ» դպրոցի ակադեմիական տնօրեն և կրթության փորձագետ Մերի Հովսեփյանն ու «Այբ» կրթական հիմնադրամի խորհրդատու-փորձագետ, «Այբ» դպրոցի հայերենի առարկայախմբի ղեկավար Անահիտ Հովհաննիսյանն ամփոփեցին նախորդ տարվա ընթացքում տարբեր գործընկերների հետ համագործակցության արդյունքում ավելի քան 1500 ուսուցչի հետ տարված վերապատրաստման և շարունակական մենտորական աշխատանքները։
«Իրականության մեջ եթե ցանկանում ես, որ երեխան լինի սովորող, դպրոցը պետք է լինի սովորող և ուսուցիչը պետք է լինի սովորող։ Եթե դու ինքդ, լինելով ուսուցիչ, զարգանում ես, դու օրինակ ես նաև քո աշակերտի համար։ Եվ ցույց ես տալիս, որ մարդը սովորում է ամբողջ կյանքի ընթացքում։ Որևէ լավ տեղ հասնելու համար դու պետք է զարգանաս։ Եվ այս առումով, կարծում եմ, ամենաէական փոփոխությունը, որը կատարվում է ուսուցիչների մտածելակերպի մեջ, հենց շարունակաբար զարգանալու և վերափոխվելու միտումն է ու ցանկությունը» (Մերի Հովսեփյան)։
«Մեր հիմնական նպատակը ուսուցչական փորձառնական համայնք ձևավորելն է։ Շարունական մենտորության արդյունքում մարզերում, որտեղ հիմնականում ծավալվում է մեր աշխատանքը, մենք ունենք այնպիսի ուսուցիչներ, որոնք արդեն հասել են այն աստիճանին, որ մեկ վերապատրաստման փուլից հետո կարող են մենտոր լինել իրենց դպրոցում։ Արդյունքում հանրապետությունում ստեղծվում է մի մշակույթ, երբ ուսուցիչները պատասխանատվություն են կրում իրենց գործընկերների համար» (Անահիտ Հովհաննիսյան)։