Երազանքի իրականացում ԲՈՒՄ-ում
Մրցույթների բաժնի համակարգող Նինա Հոբոսյանը 2009 թվականից ի վեր ներգրավված է «Այբ»-ի բնագիտական մրցաշարերի կազմակերպման մեջ։ Տասից ավելի անգամ կազմակերպված Պատանի քիմիկոսների մրցաշարը, երկու անգամ՝ Ուսանող քիմիկոսների մրցաշարը և այս տարի արդեն Բնագիտության ուսանողական առաջին մրցաշարը կյանքի են կոչվել նրա և թիմի ջանքերի, աշխատանքի շնորհիվ։
«Գիտության ԲՈՒՄերանգ» խորագրի ներքո անցած Բնագիտության ուսանողական մրցաշարի եզրափակիչ փուլը, որ տեղի ունեցավ 2022 թ. ապրիլի 23-ին, հարթակ էր դարձել նաև մրցաշարի ամենադիտարժան մասերից մեկի՝ գիտամարտի համար։ Այս անգամ զեկուցողի և ընդդիմախոսի դերում ժյուրիի անդամներն էին՝ Արմեն Գալստյանը (ԵՊՀ քիմիայի ֆակուլտետ) և Վարդան Սարգսյանը (PMI Science գիտահետազոտական կենտրոն), իսկ որպես գրախոս հանդես եկավ Նինա Հոբոսյանը։
Տարիների սպասումից հետո երազանքն իրականություն է դառնում
Բառերով չես փոխանցի այն դրայվը, հաճույքն ու մասնակիցների նկատմամբ հարգանքը, որ զգում ես այս մրցաշարի գիտամարտերում։ Թեև ժյուրիի անդամների հետ այս մարտն ինքնաբուխ ստացվեց, շատ ուրախ եմ, որ ի վերջո ես էլ այս ձևաչափով խաղալու երազանքս իրականություն դարձրի։ Կուզենայի ինձ փորձել նաև զեկուցողի դերում․ երբ ամենից շատ հարցերը քեզ են տալիս, այդ ժամանակ լրիվ ուրիշ ոգևորություն ես ապրում։
Բազմաթիվ մարտավարությունների ականատես լինելու առավելությունը․ ինչպես են գործում լավագույնները
Փորձառու թիմերն իրենց խաղաոճն ունեն․ առաջին իսկ քայլով, ըստ նախասիրությունների, բաշխում են աշխատանքը՝ առանց ամեն ինչ մեկ հոգու պատվիրակելու։ Մի փոքր հետազոտությունից հետո կայանում է երկրորդ հանդիպումը․ հենց այս ժամանակ են թիմի անդամները վերջնական հստակեցնում իրենց դիրքորոշումը հոգեհարազատ թեմայով պատասխանատվություն վերցնելու գործում։ Երբ դերերի բաշխումը ճիշտ է կատարվում, բոլորը բոլորի գործը գիտեն և միմյանց լրացնում են։
Բնագիտության ուսանողական մրցաշարը (ԲՈՒՄ) բարձրագույն կրթության ոլորտում տաղանդավոր երիտասարդների բացահայտմանն ուղղված նոր նախաձեռնություն է՝ Հայաստանի Հանրապետությունում և Արցախում ֆիզիկա, քիմիա և կենսաբանություն սովորող ուսանողների համար։