Դիլիջանի կենտրոնական դպրոցը․ երկու ընկերների կրթական ուղին
2013 թվականն էր։ Դիլիջանը՝ իր անտառներով, լեռներով ու մշուշով, սովոր էր խաղաղ առօրյային, երբ քաղաքում բացվեց մի դպրոց, որ պիտի փոխեր ոչ միայն կրթական, այլև համայնքային կյանքը։ «Այբ» կրթական հիմնադրամը Հայաստանի Հանրապետության Կենտրոնական բանկի հետ համատեղ հիմնադրեց Դիլիջանի կենտրոնական դպրոցը։
.jpg)
Այս տարվա սեպտեմբերից Դիլիջանի կենտրոնական դպրոցում գործում է նաև ավագ բաղադրիչը։ Այստեղ աշակերտները հնարավորություն կունենան սովորելու «Արարատյան բակալավրիատ» ծրագրով՝ ստանալով համաշխարհային մակարդակով մրցունակ կրթություն հենց իրենց քաղաքում։
Վահագնի ու Հարությունի դպրոցական ուղին սկսվեց Դիլիջանի կենտրոնական դպրոցում և շարունակվեց արդեն Երևանում՝ «Այբ» ավագ դպրոցում։ Տասնմեկ տարվա ուսման ճանապարհը նրանց համար դարձավ ոչ միայն գիտելիքի, այլև ընկերության ամրացման պատմություն։
Վահագն․««Այբ»-ից մի կտոր ինձ հետ կտանեմ Սորբոն»
Վահագն Ալոյանը Երևանից տեղափոխվեց Դիլիջան՝ ծնողների աշխատանքի բերումով։ Դիլիջանի կենտրոնական դպրոց ընդունվելու պահը նրա համար հիշարժան էր․ ապագա դասղեկը հարցազրույցի ժամանակ խոսում էր մոլորակներից՝ թեմա, որը Վահագնին գրավել էր դեռ մանկուց։
Տարիների ընթացքում ֆիզիկայի հանդեպ հետաքրքրությունը վերածվեց մասնագիտական երազանքի։ Այսօր արդեն շրջանավարտ՝ նա պատրաստվում է շարունակել ուսումը Սորբոնում և ապագայում մասնագիտանալ աստղաֆիզիկայի ոլորտում։
««Այբ»-ից հինգ-վեց հոգի էլ ինձ հետ շարունակելու են ուսումը Սորբոնում։ Դա ինձ համար մեծ ուրախություն է։ Կարող եմ ասել՝ ինձ հետ այնտեղ կտանեմ նաև «Այբ»-ից մի կտոր»,— ասում է նա։
Բայց Վահագնի պատմությունը միայն գիտության մասին չէ։ Նա հիշում է ազգային պարի դասերը․ առաջին հայացքից անտարբերություն առաջացնող այս առարկան ընկեր Մեսրոպի շնորհիվ դարձավ բացահայտում։ «Պարի գաղափարն ու խորությունը հենց «Այբ»-ում հասկացա․ պարը պարզապես ժամանցի միջոց չէ. ազգային մշակույթը կարող է դառնալ ինքնության ձևավորման կարևոր մաս»,— ասում է Վահագնը։
Հարություն.երաժշտության և ազգային արժեքների ճանապարհը
Հարություն Քոչարյանը Դիլիջանի կենտրոնական դպրոց տեղափոխվեց երկրորդ դասարանում։ «Տարբերությունը հսկայական էր։ Գրատախտակին կավիճով չէինք գրում, այլ մատով։ Բացի այդ, դասընթացների բազմազանությունն ու դասավանդման ձևը լրիվ այլ մակարդակի էին»,— հիշում է նա։
Հինգերորդ դասարանից երաժշտությունը դարձավ նրա կյանքի անբաժան մասը։ «Երաժշտությունն ինձ համար ոչ միայն հոբբի էր, այլև ինքնության մի մաս։ Իսկ ազգային պարը, կարելի է ասել, իմ ազգային մտածողության կերտման հիմքերից մեկն է եղել»,— ասում է Հարությունը։
Այսօր նա արդեն ապրում է Երևանում։ Սակայն վստահ է, որ Դիլիջանում ավագ դպրոցի բացումը մեծ խթան կլինի, որ երեխաներն իրենց լավագույն տարիները անցկացնեն հենց հարազատ քաղաքում և ունենան ուժեղ մեկնարկ ապագայի համար։
Ընկերություն, որ դիմացել է տարիների փորձությանը
Հարությունն ու Վահագնը ոչ միայն համադասարանցիներ են, այլև տասնմեկ տարվա ճանապարհ անցած ընկերներ։ «Այբ»-ը նրանց համար դարձավ այն միջավայրը, որտեղ կրթությունը դուրս էր գալիս դասագրքերի սահմաններից։ Այնտեղ ձևավորվեցին կապեր, որոնք կարող են ուղեկցել ամբողջ կյանքում։
Վահագնի նոր նպատակները
Վահագնի խոսքով՝ իր ամենամոտ ընկերների մեծ մասը հենց «Այբ»-ից են։ «Թվում է, թե պատճառը պարզ է․ մենք ամեն օր շատ ժամեր ենք անցկացնում միասին և այդպես արագ դառնում ենք մոտիկ ընկերներ։ Բայց իրականում մեզ միավորում է «Այբ»-ի համայնքը»,— ասում է նա։
Նրա կարծիքով՝ Դիլիջանում ավագ դպրոցի բացումը մեծ նշանակություն ունի թե՛ քաղաքի, թե՛ երեխաների համար։ «Այբ»-ում նա հատկապես կարևորում է բազմակողմանի զարգացումը։ «Դպրոցում գիտելիք ես ստանում տարբեր առարկաներից։ Նույնիսկ այն, ինչ սկզբում հետաքրքիր չէր թվում, հետո սկսում ես սիրել ու հասկանալ։ Այդ ժամանակ էլ զգում ես, թե որքան կարևոր է կրթված մարդու համար լինել բազմակողմանի զարգացած»,— ընդգծում է Վահագնը։
Հարություն․Դիլիջանի ապագայի մասին
Հարությունը վստահ է, որ Դիլիջանի կենտրոնական դպրոցի ավագ բաղադրիչը մեծ ազդեցություն է թողնելու աշակերտների վրա։ «Այստեղ զարգանում են ոչ միայն գիտելիքները, այլև ազգային գաղափարները, հայրենիքի հանդեպ սերն ու հոգատարությունը»,— ասում է նա։
Նրա համոզմամբ՝ կրթությունը երկրի ու քաղաքների զարգացման հիմնասյուներից է։ «Հայաստանի համար պարզապես անհրաժեշտ են լավ կրթված կադրեր, որոնք կարող են առաջ տանել երկիրը»,— ընդգծում է Հարությունը։
Նա կարևորում է նաև, որ կրթական նման հնարավորություններ բացվեն ոչ միայն Դիլիջանում, այլև Հայաստանի մյուս քաղաքներում։ «Ավագ դպրոցի բացումը Դիլիջանում շատ կարևոր քայլ է։ Սա հնարավորություն կտա, որ երեխաները երկար ժամանակ մնան իրենց քաղաքում և իրենց պոտենցիալը ներդնեն այստեղ։ Դա հզոր խթան կլինի քաղաքի զարգացման համար»,— ասում է նա։