60 տնօրեններ և տնօրենի հավակնորդներ մասնակցում են վերապատրաստման ծրագրի
Մեկնարկեց «Կրթության կառավարում և առաջնորդություն» վերապատրաստման ծրագրի նոր փուլը։
Ծրագիրը նպատակ ունի զարգացնելու կրթական հաստատությունների տնօրենների առաջնորդության, ռազմավարական պլանավորման ու կառավարման հմտությունները՝ ամրապնդելով կրթության կառավարման համակարգը Հայաստանում։
Յոթամսյա ծրագրին մասնակցում են 60 տնօրեններ և տնօրենի հավակնորդներ, որոնք ընտրվել են շուրջ 300 դիմորդներից։ Դասընթացները կազմակերպվելու են հիբրիդային ձևաչափով՝ առկա և առցանց հանդիպումներով։
Ծրագրի նոր փուլը ֆինանսավորվում է «Հ. Հովնանյան» ընտանեկան հիմնադրամի կողմից։
Ծրագրի նախորդ փուլում, որն իրականացվել է «Այբ» կրթական հիմնադրամի և ՅՈՒՆԻՍԵՖ-ի կողմից՝ ՀՀ ԿԳՄՍՆ հետ համագործակցությամբ և ԵՄ ֆինանսավորմամբ, մասնակիցները հնարավորություն են ունեցել խորությամբ ուսումնասիրելու կրթական կառավարման ժամանակակից մոտեցումները, առաջնորդության մոդելները և արդյունավետ թիմային աշխատանքի գործիքները։
Ծրագիրը ոչ միայն գիտելիքների և գործնական հմտությունների փոխանցման հարթակ էր, այլ նաև ձևավորեց փոխաջակցության և փորձի փոխանակման համայնք։
Կրթության որակի բարձրացման մեջ առանցքային դերակատարություն ունի առաջնորդ տնօրենը, ով կարող է ձևավորել զարգացող կրթական համայնք, խթանել նորարարությունը և ոգեշնչել ուսուցիչներին ու սովորողներին։