Շարունակվում է վերապատրաստման դասընթացը տնօրենների համար

Արդյունավետ կառավարման և առաջնորդության հմտությունները չափազանց կարևոր են կրթական հաստատությունների կայուն զարգացման համար։ Ֆինանսական կառավարումից մինչև կրթական հաստատությունների օրենսդրական դաշտի ուսումնասիրություն․ «Կրթության կառավարում և առաջնորդություն» վերապատրաստման դասընթացի մասնակիցները վերջին 2 ամիսների ընթացքում խորացրել են իրենց գիտելիքները կրթական կառավարման առանցքային ոլորտներում։

Այս ընթացքում մասնակիցներն ուսումնասիրել են ֆինանսների կառավարումը՝ ներառյալ դպրոցների ֆինանսական մոդելները, ֆինանսների արդյունավետ կառավարումը և ֆոնդահայթայթման ռազմավարությունները։ Նրանք ծանոթացել են ֆինանսական հաշվետվության հիմնական փաստաթղթերին և զարգացման ծրագրերի ֆինանսական հաշվարկներին։

Դասընթացի առանցքում է եղել նաև կրթական իրավունքը։ Մասնակիցները ծանոթացել են դպրոցների աշխատանքը սահմանող հիմնական օրենքներին, վերահսկող մարմինների իրավասություններին, ինչպես նաև դպրոցների պարտադիր փաստաթղթաշրջանառությանը և դրա հետ կապված կարգավորումներին։ Հատուկ ուշադրություն է դարձվել դպրոցի զարգացման ծրագրերի նկատմամբ ներկայացվող պահանջներին և կրթական քաղաքականության մշակման գործընթացներին։

Վերապատրաստումը մասնակիցներին հնարավորություն է տվել ոչ միայն ձեռք բերելու արժեքավոր գիտելիքներ, այլև զարգացնելու ռազմավարական հմտությունները։ Ստացված փորձառությունը կօգնի ավելի արդյունավետ ղեկավարելու կրթական հաստատությունները, բարելավելու ֆինանսական կառավարումը և ապահովելու դպրոցների զարգացման ծրագրերի կայուն իրականացումը։

Վերապատրաստումն իրականացնում են «Այբ» կրթական հիմնադրամը և ՅՈՒՆԻՍԵՖ-ը ԿԳՄՍ (ՀՀ կրթության, գիտության, մշակույթի և սպորտի նախարարություն) նախարարության հետ համատեղ և ԵՄ ֆինանսական աջակցությամբ: