«Կենգուրու», «Մեղու» և այբական մի շարք մրցույթներ այսուհետ անցկացնելու է «Քոնթեստս Լաբ»-ը

Սեպտեմբերի 18-ին «Այբ» կրթական հիմնադրամի և «Քոնթեստս Լաբ» կրթական հասարակական կազմակերպության միջև վավերացված հուշագրի համաձայն՝ հիմնադրամը «Քոնթեստս Լաբ» կրթական ՀԿ-ին է փոխանցում իր ստեղծած և 2008 թվականից իրականացվող մրցույթների («Կենգուրու», «Մեղու», «Ռուսական արջուկ», Ռոբոտների համաշխարհային օլիմպիադա և «Լեգոստարտ» ռոբոտաշինական մրցաշար) անցկացման իրավունքը: Մեր գործընկեր «Քոնթեստս Լաբ»-ին է փոխանցվում նաև մրցույթների անցկացման հարթակի և դրանց առնչվող նյութերի տիրապետման, օգտագործման և տնօրինման իրավունքը՝ լիազորելով վերջինիս լինելու մրցույթների հեղինակային իրավունքները կրողը և զարգացնելու մրցույթների անցկացման, տարածման ու ընդլայնման ծրագրերը:

Մեզ հաջողվել է ստեղծել կրթական մեծ շարժում՝ Հայաստանից, Արցախից ու սփյուռքից 750 575 մասնակիցներով, և նպաստել դպրոցականների առարկայական գիտելիքների ամրապնդմանը,  գիտական միջավայրի ու առարկայական ուղղությունների հանդեպ հետաքրքրության խթանմանը, բանավեճի և վերլուծական կարողությունների զարգացմանը և մասնագիտական կողմնորոշմանը: Բազմաթիվ հայ երեխաներ մեր երկիրը ներկայացրել են միջազգային հարթակներում՝ բացահայտելով զարգացման նոր հեռանկարներ։ Ստեղծվել են ամենատարբեր ճյուղերի մասնագետներին ու գործընկերներին համախմբող մասնագիտական ուժեղ համայնքներ՝ թե՛ սեփական ուժերով և թե՛ միջազգային համագործակցությամբ:

Այսպիսով՝ «Քոնթեստս Լաբ» ՀԿ-ն (նախագահ՝ Տաթևիկ Ադամյան) դառնում է վերոնշյալ մրցույթների միակ իրականացնողը և պատասխանատուն։ ՀԿ-ի պաշտոնական էլհասցեն է՝ [email protected]։