Տևական համագործակցության մեկնարկ «Երևան Մոլ»-ի հետ
Դեկտեմբերի 8-ին «Այբ» կրթական հիմնադրամը և «Երևան Մոլը» հուշագրի ստորագրմամբ ազդարարեցին կրթության շուրջ նոր ու տևական համագործակցության մեկնարկը։ Կարևորելով կրթությունը և առաջնորդվելով սոցիալական պատասխանատվության գաղափարով՝ «Երևան Մոլը» շարունակական աջակցություն է ցուցաբերելու «Այբ» կրթական հիմնադրամի կրթական նախաձեռնություններին՝ այն սկսելով հայերենի «Մեղու» մրցույթի շրջանակում գործընկերությամբ։
«Այբ»-ի զանգվածային մրցույթների ընթացքում «Երևան Մոլը» կօգնի մեծացնելու արդի կրթական հնարավորությունների հասանելիությունն ավելի մեծ թվով շահառուների համար։ Մասնավորապես՝ «Նավապետ Քիդ» զվարճանքի կենտրոնը զգալի ներդրում կունենա ինչպես մրցույթների մրցանակային ֆոնդում, այնպես էլ մրցանակակիրների և հաղթողների պարգևատրման արարողության ժամանակ՝ օգնելով ապահովելու երեխաների տոնական ժամանցը։
Սա կառույցների առաջին համագործակցությունը չէ և գալիս է շարունակելու տարվա առաջին կեսին մեկնարկած գործակցությունը։ Ամռանը «Նավապետ Քիդի գանձերի կղզին» հարթակ էր դարձել 2021 թվականի «Կենգուրու» և «Մեղու» մրցույթների մրցանակաբաշխության համար՝ աջակցելով միջոցառումներին և երեխաներին նվիրելով կրթական տոն։
Դեկտեմբերի 26-ին և 27-ին աշխարհում հայերենի ամենամեծ դպրոցական մրցույթը կանցկացվի Հայաստանի Հանրապետության և Արցախի 3-12-րդ դասարանցիների համար։ Դեկտեմբերի 19-ին այն առանձին փուլով կանցկացվի նաև սփյուռքի հայալեզու աշակերտների համար։ «Մեղու»-ի նպատակը սերունդների մեջ ազգային ինքնության բանալին հանդիսացող հայոց լեզվի հանդեպ սեր ու հոգածություն ձևավորելն է՝ պահպանելով լեզվի տարածումն ու դերն աշխարհում։