«Այբ» կրթական հիմնադրամն ունի նոր գործադիր տնօրեն
«Այբ»-ն ինձ համար օրինակ է, թե ինչպես կարող է երազանքն իրականություն դառնալ պատասխանատու և հոգատար մարդկանց միջոցով: Ես հավատում եմ «Այբ»-ի գաղափարին, որ կրթությունն է մեր երկիրը հզորացնելու ամենաուղիղ միջոցը, և այդ հավատով ու ոգևորությամբ եմ վերջին վեց տարիներին մասնակցել Հայաստանում բարձրորակ կրթություն ապահովելու այբական առաքելության իրագործմանը, ներդրել կառավարման իմ ամբողջ փորձը: Եվ հիմա՝ զարգացման նոր փուլում, հոգաբարձուների խորհուրդն ինձ է վստահել հիմնադրամն առաջնորդելու պատասխանատվությունը: Սա իսկապես մեծ պատասխանատվություն է, երբ հաշվի ես առնում, թե ինչպիսի նվիրյալ մարդիկ են ղեկավարել կարևոր դերակատարություն ունեցող այս կառույցը և թե ինչ համակարգային ազդեցության նախագծեր են մշակվել այս թիմում:
Ուրախ եմ, որ տարիների ընթացքում ձևավորվել է ընդհանուր առաքելության շուրջ միավորված այսպիսի կուռ գործընկերություն: Ձեր ջանքերի շնորհիվ մեր յուրաքանչյուր նախաձեռնություն ավելի է մոտեցնում կրթված սերունդ ունենալու, մրցունակ, որակյալ և օրինակելի կրթական համակարգեր ստեղծելու մեր երազանքի իրականացումը: Շնորհակալ եմ ձեզնից յուրաքանչյուրին մեր երկրի կրթության զարգացման գործին մասնակցելու և վստահության ու աջակցության համար:
Համոզված եմ, որ ճիշտ նպատակադրումներով և բոլորիս համատեղ աշխատանքով մեզ կհաջողվի լավագույն կրթության հնարավորությունը Հայաստանում հասանելի դարձնել բոլոր սովորողներին: