Երկարատև համագործակցության հերթական այցը
Հուլիսի 15-16-ին «Այբ» կրթական հիմնադրամը հյուրընկալեց Ստիվ Քինգին` Քեմբրիջի համալսարանի «Համագործակցություն հանուն կրթության» կառույցի Կրթության բարեփոխումների բաժնի՝ Եվրոպայի և Կենտրոնական Ասիայի գծով ղեկավարին։
Սա «Այբ»-ի հետ Քեմբրիջի համալսարանի երկարատև համագործակցության հերթական այցն էր։ Ստիվ Քինգը նախ ծանոթացավ «Այբ» դպրոցին, կրթական միջավայրին ու հնարավորություններին։ Այնուհետև քննարկվեցին երկրում տեղի ունեցող կրթական բարեփոխումների համատեքստում Քեմբրիջի և «Այբ» հիմնադրամի հետ համատեղ մշակված «Արարատյան բակալավրիատ» կրթական ծրագրի զարգացման և տարածման հնարավորություններն ու ուղղությունները ՀՀ դպրոցներում։
«Այբ» հիմնադրամի ներկայացուցիչները և Ստիվ Քինգը հանդիպում ունեցան նաև ԿԳՄՍ փոխնախարար Արաքսյա Սվաջյանի և հանրակրթության վարչության պետ Թամարա Սարգսյանի հետ։ Հանդիպման ընթացքում նախանշվեցին կրթական համակարգի այն ուղղությունները, որոնց շրջանակներում Քեմբրիջի փորձն ու աջակցությունը կարող են օգտակար լինել։ Մասնավորապես քննարկվեց նոր ՀՊՉ-ին համապատասխան գնահատման համակարգի, կրթական ռեսուրսների և դասագրքերի հարցը։