Առցանց «Կենգուրուն»՝ Մարգարիտայի աչքերով
2020 և 2021 թվականներին «Կենգուրու» մաթեմատիկական մրցույթն անցկացվեց առցանց, և, չնայած նորամուծությանն ու որոշ դժվարություններին, առցանց հարթակը մասնակիցներին տվեց ինքնուրույն գրանցվելու և մասնակցելու, մրցույթից առաջ նախորդ թեստերով պարապելու ու մրցույթին որոշ փորձառությամբ մասնակցելու նոր հնարավորություն։ Մարգարիտան՝ մեր հերոսուհին, երեք տարի անընդմեջ մասնակցում է «Կենգուրու» մաթեմատիկական մրցույթին և կարող է համեմատել «Կենգուրուի» առցանց և դասարանային տարբերակները։ Նրա ընտանիքում մրցույթի երկու տարբերակն էլ ընդունվում են միևնույն ոգևորությամբ։
Մեզ հետ խոսելիս Մարգարիտան պատմեց, որ «Կենգուրու» հարթակում գրանցվել է հայրիկի հետ, որը դստերը տրամադրել է սեփական էլեկտրոնային հասցեն։ 2020 թվականին բախվել են որոշակի տեխնիկական խնդիրների, սակայն արդեն այս տարի ինքնուրույն կարողացել է սահուն անցնել մրցույթը։
«Կենգուրուի» փոքրիկ երկրպագուն մեզ պատմեց, որ համավարակի բերած սահմանափակումների պատճառով կարոտել է ընկերներին ու դպրոցական միջավայրը և միշտ ուզել է վերադառնալ դպրոցական ավանդական դասերին, սակայն Մարգարիտան նույն կարծիքը չուներ «Կենգուրուի» մասին։ Ավստրալիացի մեր ընկերոջը Մարգարիտան պատրաստ է դիմավորելու թե՛ համակարգչի էկրանից, թե՛ սպիտակ թղթի վրա։ Մարգարիտան նշեց, որ «Կենգուրուին» մասնակցել է իրենց հյուրասենյակից, որը վերջին շրջանում դարձել էր իր և քույրիկի դասարանը։ Տանը նստած՝ աղջիկը ավելի հանգիստ է եղել, կենտրոնանալը՝ ավելի հեշտ, իսկ բոլոր գործողությունները՝ մուտք գործելուց մինչև թեստն ուղարկելը, մենակ կատարելը սեփական ուժերի հանդեպ վստահության հերթական լիցքն է տվել Մարգարիտային։
Մարգարիտան «Կենգուրուին» սպասում է անկախ դրա ձևաչափից, քանի որ «Կենգուրուի» մաթեմատիկական խնդիրները հաճելի խաղ է համարում, ոչ թե միայն հաղթելու նպատակով մրցույթ։ Մարգարիտայի ու նման ոգևորված երեխաների համար էլ «Կենգուրուն» արդեն քանի տարի է՝ վերադառնում է Հայաստան՝ անկախ համաշխարհային խնդիրներից։
«Կենգուրուն» և «Այբ» կրթական հիմնադրամի այլ մրցույթները հնարավոր եղավ օպերատիվ կերպով դարձնել առցանց շնորհիվ Uteach հարթակի, որը նոր մարտահրավերներին համապատասխան ավելի ժամանակակից դաշտ է ապահովում կրթության համար և օգնում ձևավորելու նոր կրթական մշակույթ՝ հիմնված որակի և կայունության վրա։