Արարատյան բակալավրիատի նոր դպրոց

Եկել ենք ձեզ հայտնելու մի շատ սպասված և ոգևորող նորություն: «Այբ» համակարգի ևս մեկ դպրոց՝ Դիլիջանի կենտրոնական դպրոցը, սեպտեմբերից կունենա ավագ բաղադրիչ, որտեղ կրթությունը կկազմակերպվի միջազգային ճանաչում ունեցող «Արարատյան բակալավրիատ» (ԱԲ) ծրագրով: Դպրոցը ստացել է միջնակարգ հանրակրթություն մատուցելու լիցենզիա և կապահովի ամբողջական կրթություն:

Այս նորությունը կրթականից բացի ունի նաև համայնքային կարևոր նշանակություն։ Սա բացառիկ հնարավորություն է մի ամբողջ համայնքի նոր սերնդի համար՝ իր համայնքում ու հարազատ միջավայրում ստանալու միջազգային չափանիշներին համապատասխան հայալեզու, ամբողջական ու արժեքահեն կրթություն, հետագայում սովորելու Հայաստանի լավագույն բուհերում և աշխարհի ամենահեղինակավոր համալսարաններում:

Դիլիջանի դպրոցը, որը ստեղծվել է «Այբ» կրթական հիմնադրամի կողմից՝ Կենտրոնական բանկի հետ համագործակցությամբ,ԱԲ-ի դպրոցների ցանցին միացող երկրորդ դպրոցն է: «Այբ» կրթական հիմնադրամն ԱԲ-ը ստեղծել է՝ նպատակ ունենալով լավագույն կրթությունը հասանելի դարձնել բոլորին, և նոր դպրոցում ծրագրի ներդրումը կարևոր հանգրվան է մեր առաքելության իրականացման ճանապարհին:

Հիշեցնենք, որ Արարատյան բակալավրիատը հայալեզու ծրագիր է, որը Քեմբրիջի գնահատման և միջազգային կրթության կենտրոնի և UK NARIC-ի կողմից ճանաչվել է բրիտանական A Levels և ամերիկյան AP որակավորումներին համազոր:

ԴԿԴ 2025-2026 ուսումնական տարվա ընդունելության ժամանակացույցին ու ընթացակարգին ծանոթացե՛ք այստեղ։