8-րդ սերունդը՝ «Այբ»-ի 8 սկզբունքներով զինված
2020 թ․-ին դպրոցն ավարտել է 70 աշակերտ։
2017-20 թթ․ ընթացքում ունեցել ենք հանրապետական օլիմպիադաների 20 դիպլոմ, 124 անհատական ու խմբային նախագծեր:
Այս ամենը չէր լինի առանց 2160 համեղ ընդմիջումների, 250 անքուն գիշերների, 92 քննությունների, բակում անցկացվող վոլեյբոլի խաղերի, «Այբ»-ում ապրված անթիվ-անհամար պահերի, որոնց ընթացքում ձևավորվեց 4 դասարան՝ մեկ սերունդ։
Մեր դպրոցական տարիներն այսքան հագեցած ու գունեղ չէին լինի, եթե դուք չաջակցեիք մեր ծնողներին, ձեր հոգու մասնիկն անձնվիրաբար չդնեիք մեր կյանքի այս կարևորագույն փուլում։ Մենք սովորել ենք այբական շահադրդիչ ու կենսուրախ շենքում։ Անգամ տնից դպրոց մեր ճանապարհն է դարձել արժեքավոր հիշողություն՝ լի ժպիտներով, երգերով, հոգնած լռությամբ։ Մեր ուսումնական ճամփորդությունների ընթացքում կարողացել ենք վերագտնել ու վերարժևորել մեր մշակույթը, տարբեր կազմակերպությունների հետ համագործակցությունների շնորհիվ հնարավորություն ենք ստացել նոր աշխարհներ բացահայտելու, մեր հաջողության սանդուղքի հերթական աստիճանը նվաճելու։
Դուք ընդլայնել եք «Այբ» համայնքի աշխարհագրությունը, քանի որ ձեր աջակցությամբ շուրջ երեք տասնյակ աշակերտներ Հայաստանի Հանրապետության մարզերից ու Արցախից ապահովվեցին ամբողջական կրթաթոշակով, ինչպես նաև հնարավորություն ստացան բնակվելու հարմարավետ ու ջերմ կացարանում։ Այս համայնքի հիմքում ընկած են այն արժեքները, որոնք դուք սերմանել եք դպրոցի ստեղծման առաջին օրերից։ Ձեր լուսավոր օրինակները մեր աչքի առջև ունենալու շնորհիվ մենք դարձել ենք նախաձեռնող ու հավասարակշռված՝ փորձելով գտնել ամենատարբեր խնդիրների լուծումները, դարձել զգոն ու բաց՝ լսելու և ընդունելու տարբեր տեսակետներ։ Սովորել ենք ոչ միայն կիրառել տրվածը, այլև կերտել նորը։ Մենք հպարտ ենք, որ մի մասն ենք համայնքի, որը ձգտում է սերնդեսերունդ փոխանցել արժեքներ՝ ստեղծարար, բարեխոհ և հոգատար հասարակություն կերտելու համար։
8-րդ սերունդը զինված «Այբ»-ի 8 սկզբունքներով, պատրաստ է մտնելու նոր կյանք, որը, համոզված ենք, լինելու է հաջողության ճանապարհի սկիզբ։ Երախտապարտ ենք, որ մեզ՝ երազանքներով ու նպատակներով լի ևս մեկ սերնդի, հնարավորություն եք ընձեռել մեր առաքելությունն իրագործելու։ Ձեր հավատը մեզ թևեր է տվել․ դրան ի պատասխան՝ մենք խոստանում ենք թևեր տալ ապագա սերունդներին։ Շնորհակալ ենք, որ կարևորել եք մեր կրթությունը մեր իսկ երկրում, նվիրվել եք նոր կրթական մշակույթ ստեղծելու գործին և որ մեզ եք վստահել աշխարհն ու հասարակությունը վերափոխելու ձեր ծրագրի շարունակականությունը։ Հավաստիացնում ենք, որ «Այբ»-ի խորհրդանշական՝ 8-րդ սերունդը, միանալով շրջանավարտների մեծ համայնքին, կլինի արժանի և կդառնա ձեր գաղափարների ժառանգորդը։ Մենք կդառնանք այն օղակը, որով կփոխանցվեն այբական արժեքները, կլինենք ձեր ծրագրերի ու նպատակների արտացոլանքը «Այբ» դպրոցի, Հայաստանի, ինչպես նաև աշխարհի զարգացման գործում։
Նամակի տեքստն ու դիզայնն ամբողջությամբ պատրաստել են «Այբ» դպրոցի աշակերտները։ Դիտե՛ք նաև նրաց ստեղծած տեսանյութը: