15 փաստ Արարատյան բակալավրիատի մասին

1. Արարատյան բակալավրիատը (ԱԲ) «Այբ» կրթական հիմնադրամի կողմից Հայաստանում ստեղծված հայալեզու ամբողջական, ինքնաբավ կրթական ծրագիր է:

2. «Այբ» կրթական հիմնադրամն ԱԲ-ը ստեղծել է Քեմբրիջի համալսարանի և Լոնդոնի համալսարանական քոլեջի (UCL) հետ համագործակցությամբ։

3. ԱԲ-ը միջազգային ճանաչում է ստացել ոչ թե որևէ համակարգի մաս դառնալով (ինչպես օրինակ՝ Միջազգային բակալավրիատը), այլ ստանալով ճանաչում հեղինակավոր կազմակերպություններից՝ հավասարության սկզբունքով: 

4. 2016-ին Քեմբրիջի գնահատման և միջազգային կրթության կենտրոնը և UK NARIC-ը ԱԲ-ը ճանաչել են բրիտանական A Level և ամերիկյան AP որակավորումներին համազոր:

5. ԱԲ-ը գերազանցության ծրագիր է․ ավելին է դպրոցական պարտադիր ծրագրից և հատվում է բուհականի հետ` շրջանավարտին տալով մրցակցային առավելություն համալսարան ընդունվելու ժամանակ: 

6. ԱԲ-ը՝ որպես ինքնուրույն կրթական ծրագիր, միջազգային ճանաչում է ձեռք բերել ընդամենը 18 ամսում` հիմքում ունենալով 2006 թվականից «Այբ»-ի ստեղծած բովանդակությունը: 

7. ԱԲ-ի ճանաչումն անժամկետ է: ԱԲ ծրագրի շրջանավարտը հետագա կրթության համար կարող է ընտրել գրեթե ցանկացած բուհ ցանկացած երկրում: 

8. ԱԲ-ն ուսուցանող ավագ դպրոցի յուրաքանչյուր աշակերտ ունի իր անհատական դասացուցակը` կազմված պարտադիր և ընտրովի, ստանդարտ և խորացված առարկաներից: 

9. ԱԲ-ի քննություններն աշխարհում առաջին և միակ հայալեզու քննություններն են, որ համապատասխանում են միջազգային չափանիշներին ու պահանջներին։

10. Ծրագիրը հնարավորություն է տալիս առանց հավելյալ քննություններ հանձնելու, միայն ԱԲ-ի ավարտական քննություններով ընդունվելու աշխարհի ամենահեղինակավոր համալսարաններ և Հայաստանի լավագույն բուհեր:

11. ՀՀ պետական բուհեր ընդունելությունը տեղի է ունենում ԱԲ-ի համար հատկացված տեղերով (մինչև պետական քննական համակարգի նոր չափորոշիչներին անցումը և գործընթացների համաժամացումը):

12. ԱԲ-ն ապահովում է աշակերտների մասնագիտական կողմնորոշումն ու բուհական նպատակադրված ուղղորդումը, ինչը բացառիկ է մեր կրթական համակարգում:

13. ԱԲ-ի խոշոր բաղադրիչ է նախագծային կրթությունը, որը զարգացնում է աշակերտի կարևորագույն հմտություններ, նպաստում մասնագիտական կողմնորոշմանը և առավել մրցունակ դարձնում բուհեր ընդունվելիս:

14. Որպես արժեքահեն բաղադրիչ՝ 2023 թ․ ԱԲ կրթական ծրագրում լիարժեք ներդրվել է «Ինքնություն և արժեքներ» առարկան։ 

15. ԱԲ-ի նկարչության խորացված դասընթացը և դրա ավարտական քննությունը հնարավորություն են տալիս ընդունվելու արվեստի լավագույն բուհեր ամբողջ աշխարհում: