Դիլիջանի ավագ դպրոցում մեկնարկեց «Այբպրո» նախագծային ուսումնառության ծրագիրը
Դիլիջանի ավագ դպրոցում պաշտոնապես մեկնարկեց «Այբպրո» նախագծային ուսումնառության ծրագիրը, որը կյանքի է կոչվում «Կերոն» զարգացման հիմնադրամի և «Այբ» կրթական հիմնադրամի համագործակցությամբ։ Ծրագրի իրականացմանն աջակցում է Դիլիջանի համայնքապետարանը։
Ծրագիրը, որը հիմնված է «սովորել անելով» սկզբունքի վրա, նպատակ ունի աշակերտներին տրամադրելու ոչ միայն խորացված առարկայական գիտելիքներ, այլև զարգացնելու 21-րդ դարի հմտություններ՝ քննադատական մտածողություն, հաղորդակցման և թիմային աշխատանքի կարողություններ, նախաձեռնողականություն և պատասխանատվության զգացում։
«Այբպրո»-ն 2015 թվականից հաջողությամբ գործում է «Այբ» դպրոցում՝ որպես միջազգային ճանաչում ունեցող «Արարատյան բակալավրիատ» ծրագրի բաղկացուցիչ, իսկ այժմ «Այբ» կրթական հիմնադրամի և «Կերոն» հիմնադրամի համագործակցությամբ հասանելի է դառնում նաև Դիլիջանի ավագ դպրոցի աշակերտներին։
Մեկնարկային միջոցառմանը «Այբ» կրթական հիմնադրամի գործադիր տնօրեն Վահե Գաբրիելյանը, ողջունելով նախագծի մասնակիցներին, կարևոր ձեռքբերում համարեց, որ «Այբ» դպրոցի հաջող փորձառությունը տարածվում է «Այբ»-ից դուրս՝ հասանելի դառնալով լայն հանրությանը: «Այբ» կրթական հիմնադրամը նախագծային ուսումնառության կարողությունները հանրակրթական դպրոցներում զարգացնելու մեծ փորձ ու դերակատարություն ունի՝ ԿԳՄՍՆ, ՅՈՒՆԻՍԵՖ-ի, Համաշխարհային բանկի և այլ կառույցների հետ համագործակցությամբ: Իսկ այսօր «Այբպրո» մոդելը՝ որպես առանձին նախագիծ, դուրս է գալիս «Այբ»-ի սահմաններից և առաջին անգամ ամբողջությամբ ներդրվում հանրակրթական այլ դպրոցում: «Սա ոչ միայն նոր հնարավորություններ է ստեղծում Դիլիջանի ավագ դպրոցի աշակերտների համար՝ ստանալու խորքային գիտելիք և դառնալու ավելի մրցունակ, այլև համայնքային խնդիրներին անդրադառնալու և դրանց լուծման գործում ներդրում ունենալու պատասխանատվություն է ձևավորում աշակերտների շրջանում»,- նշեց հիմնադրամի տնօրենը:
Միջոցառման մասնակիցներին ողջունեցին նաև Դիլիջան համայնքի ղեկավար Դավիթ Սարգսյանը, Դիլիջանի ավագ դպրոցի տնօրեն Արա Արամյանը և «Կերոն» զարգացման հիմնադրամի գործադիր տնօրեն Վանանե Արարքցյանը:
Բաց մրցույթի արդյունքում ընտրված հինգ մասնագետները ներկայացրին իրենց գաղափարները և այն ոլորտները, որոնց խնդիրների լուծմանը կուղղվեն նախագծերը։ Աշակերտները միջոցառման ավարտին քվեարկությամբ ընտրեցին երեք ոլորտներ և երեք նախագծավարներ: Այսպիսով դպրոցում ձևավորվեցին երեք նախագծային ակումբներ, որոնցից յուրաքանչյուրում աշակերտները, նախագծավարի առաջնորդությամբ մոտ մեկ տարի աշխատելով, կզարգացնեն և կիրականացնեն նախագծեր՝ ուղղված համայնքի իրական խնդիրների լուծմանը։
«Այբպրո»-ն Դիլիջանում առայժմ փորձնական ծրագիր է, որը հաջողությամբ պսակվելու դեպքում կարող է հետագայում ներդրվել նաև Հայաստանի այլ համայնքներում։