Քեմբրիջի միջազգային GCE A Level-ի որակավորում՝ «Այբ» դպրոցում
Ուրախ ենք տեղեկացնելու, որ 2026-2027 ուսումնական տարվանից սկսած՝ «Այբ» դպրոցն Արարատյան բակալավրիատն ընդլայնում է նոր որակավորմամբ և առաջարկում է նաև Քեմբրիջի միջազգային GCE А Level: Սա նշանակում է, որ Արարատյան բակալավրիատի հնարավորություններին ու առավելություններին ավելանում է ևս մեկը․ «Այբ» ավագ դպրոցի աշակերտները կկարողանան որպես լրացուցիչ բաղադրիչ ընտրել GCE А Level-ը, անգլերենով քննություն հանձնել և կրթությունը շարունակելու համար օգտվել նաև Քեմբրիջի միջազգային դպրոցի կարգավիճակի բոլոր հնարավորություններից:
Սա մեր աշակերտների համար հավելյալ հնարավորություն է, քանի որ Արարատյան բակալավրիատն ինքնին գերազանցության ծրագիր է և միջազգայնորեն ճանաչված որակավորում, որը համազոր է ամենաբարձր՝ բրիտանական A Level և ամերիկյան AP որակավորումներին: «Այբ»-ի աշակերտները «Արարատյան բակալավրիատ» ծրագրի շնորհիվ ստանում են ոչ միայն ամբողջական ու խորքային գիտելիքներ և կարևոր հմտություններ, այլ նաև լայն հնարավորություն՝ կրթությունը շարունակելու տեղական ու միջազգային ամենահեղինակավոր համալսարաններում, որոնց թվում են նաև Շանհայյան ցուցակի լավագույն 50-ի մեջ ընդգրկված բուհեր: