Սովորողներին

Հիմնադրամի խոշոր նախագծերից է «Այբ» դպրոցը, որտեղ ազգային հիմքի վրա մշակվում են կրթական ամենաառաջադեմ ծրագրեր՝ ստեղծելով 21-րդ դարի հայկական դպրոցի լավագույն մոդելը: «Այբ» ավագ դպրոցում ուսումնառությունն անցկացվում է միջազգային ճանաչում ունեցող «Արարատյան բակալավրիատ» ծրագրով, որը Քեմբրիջի գնահատման և միջազգային կենտրոնը և Մեծ Բրիտանիայի ճանաչման և համեմատության ազգային գործակալությունը համազոր են ճանաչել բրիտանական GCE A Level և ամերիկյան Advanced Placement խորացված մակարդակի դպրոցական որակավորումներին: «Այբ» ավագ դպրոցում սովորելու համար գործում է ուսման վարձի փոխհատուցման համակարգ:

«Այբ»-ը ՀՀ կենտրոնական բանկի հետ համագործակցությամբ Դիլիջան քաղաքում հիմնել է Դիլիջանի կենտրոնական դպրոցը, որը «Այբ» ընտանիքի՝ արտաքին պատվերով և ֆինանսավորմամբ իրականացված առաջին դպրոցական նախագիծն է: Դպրոցն ունի տարրական և միջին բաղադրիչներ և ոչ միայն Դիլիջանի, այլև ամբողջ տարածաշրջանի համար ծառայում է որպես նորարար կրթական հանգույց։ Այստեղ գործում է նաև ԱՄՆ-ի Մասաչուսեթսի տեխնոլոգիական ինստիտուտի հետ համատեղ ստեղծված արհեստանոց-լաբորատորիա՝ ֆաբլաբ։ Լաբորատորիան հագեցած է հատուկ սարքավորումներով և նյութերով՝ թույլ տալով նորարարական տեխնոլոգիաներ կիրառել գիտական տարբեր ոլորտներում:

«Այբ» ընտանիքի դպրոցներում կրթվող համայնքի զարկերակը նախագծային ուսումնառության ակումբներն են, որոնք գտնում են իրական կյանքում հանդիպող ամենաարդի խնդիրների համալիր լուծումներ: «Այբ»-ի կարևոր ծրագրերից են նաև տարբեր մարզերում գործող 11 «ԱյբԼաբ»-երը, որոնք սովորողների համար ստեղծում են նորը ճանաչելու, առարկան գործնականորեն տիրապետելու միջավայր, ինչպես նաև 2 ֆաբլաբերը՝ ԱՄՆ-ի Մասաչուսեթսի տեխնոլոգիական ինստիտուտի ստեղծած «խելացի» արհեստանոց-լաբորատորիաներ, որոնք թույլ են տալիս արտադրելու գրեթե «ամեն ինչի» ձևանմուշ։

Ինքնակրթությունը խրախուսելու և աշակերտներին որակյալ ու անվճար հայալեզու ուսումնական նյութերով ապահովելու նպատակով գործում է «Քան» ակադեմիայի հայալեզու հարթակը, որտեղ սովորողն ինքն է պլանավորում իր ուսումը։ «Քան» ակադեմիան առաջարկում է տեսադասեր և վարժություններ մաթեմատիկա, տնտեսագիտություն, գիտություն, կենսաբանություն, քիմիա, ֆիզիկա, ծրագրավորում, արվեստ և հումանիտար գիտություններ, SAT և այլ առարկաներից: Հարթակի խաղային տարրերն օգնում են հեշտացնելու ուսման գործընթացը և ապահովում անխափան ուսումնառություն ցանկացած վայրից։