2016 թվականից «Այբ» կրթական հիմնադրամը Հայաստանում անցկացնում է Ռոբոտների համաշխարհային օլիմպիադան (ՌՀՕ)՝ լինելով մրցույթի հայաստանյան ներկայացուցիչը և ազգային փուլի միակ և պաշտոնական կազմակերպիչը: «Այբ»-ն այս օլիմպիադայով ձգտում է խթանել մեր դպրոցներում ռոբոտաշինության, ծրագրավորման ու ճարտարագիտության դասավանդումը։
Մրցույթը հարթակ է՝ զարգացնելու՝
• տրամաբանությունն ու ճարտարագիտական ունակությունները,
• ստեղծագործ միտքը,
• ծրագրավորման տեսական գիտելիքների կիրառման հմտությունները։
Մրցույթը հնարավորություն է տալիս լավագույն արդյունքի դեպքում մասնակցելու Ռոբոտների համաշխարհային օլիմպիադայի միջազգային փուլին։
ՌՀՕ-ն թիմային մրցույթ է: Յուրաքանչյուր թիմում կարող է լինել 2-3 մասնակից: Մրցույթին կարող են մասնակցել 8-19 տարեկան աշակերտները՝ համապատասխան տարիքային մակարդակներում: ՌՀՕ-ի ազգային փուլի առաջադրանքները նույնն են, ինչ միջազգային փուլինը: Ազգային մրցաշարի հաղթող թիմերին սպասում են անակնկալ մրցանակներ, իսկ գլխավոր մրցանակակիրը կստանա ուղեգիր դեպի Ռոբոտների համաշխարհային օլիմպիադայի միջազգային փուլ։
2016-2022 թվականների ընթացքում միջազգային այս հեղինակավոր մրցույթին մասնակցել են 92 թիմ և 264 սովորող։ Ազգային փուլում հաղթողները հնարավորություն են ստացել ներկայացնելու Հայաստանը Ռոբոտների համաշխարհային օլիմպիադայի միջազգային փուլում։
2023 թվականի սեպտեմբերին «Քոնթեստս Լաբ» կրթական ՀԿ-ի հետ կնքած հուշագրով՝ «Այբ» կրթական հիմնադրամն իր գործընկերոջը փոխանցեց մրցույթի անցկացման իրավունքը:
