Բարձրագույն կրթության ոլորտում տաղանդավոր երիտասարդների բացահայտմանն է ուղղված 2022-ին մեկնարկած Բնագիտության ուսանողական մրցաշարը (ԲՈՒՄ)։ Այն 2010-ից դպրոցականների համար կազմակերպվող Պատանի քիմիկոսների մրցաշարի տրամաբանական շարունակությունն է։ Գալիս է ընդլայնելու 2020-ին մեկնարկած Ուսանող քիմիկոսների մրցաշարը՝ ընդգրկելով ոչ միայն քիմիան, այլև բնագիտական մյուս ոլորտները։
ԲՈՒՄ-ը Հայաստանի Հանրապետության և Արցախի բուհերում կենսաբանություն, ֆիզիկա և քիմիա ուսումնասիրող ուսանողների համար է: Այն մեկ թիմում միավորում է տարբեր բուհեր և գիտական ճյուղեր ներկայացնող երիտասարադների՝ խթանելով ամենաարդի խնդիրների համար բազմակողմանի լուծումներ գտնելու մշակույթը։
Մրցաշարն անցնում է «Գիտության ԲՈՒՄերանգ» կարգախոսի ներքո՝ խորհրդանշելով ամեն նոր սերնդի՝ բումերանգի նմանվող անընդհատ վերադարձը գիտության աշխարհ։
ՀՀ-ում և Արցախում գիտական մտքի զարգացումն ու ուժեղ համայնքի ձևավորումն ընկած են հզոր և 21-րդ դարի մարտահրավերներին պատրաստ երկիր ունենալու հրամայականի հիմքում։ Աշխարհի առջև ծառացող բազմաբարդ խնդիրների հաղթահարումը պահանջում է խորքային լուծումներ և ջանքերի համատեղում։ Նման գործակցության մոդելի կառուցմանն է միտված Բնագիտության ուսանողական մրցաշարը։
Մրցաշարը գալիս է վերարժևորելու գիտության կարևորությունն ու ընկալումը բնական գիտություններով զբաղվող ուսանողների և հանրության համար։ Ստեղծված ընդհանուր հարթակում մասնակիցները հնարավորություն ունեն՝
• կիրառելու գիտելիքներն ամենաարդի խնդիրների լուծման մեջ,
• ճանաչելի դառնալու մասնագիտական համայնքի և գործատուների համար,
• միանալու գիտական մեծ համայնքի՝ հետագա նոր համագործակցությունների համար անհրաժեշտ կապերի հաստատմամբ։
Մրցաշարի ընթացքում 4-5 հոգանոց ուսանողական թիմերը հնարավորություն ունեն՝
• կատարելու գիտական փորձեր,
• ստանալու ոլորտի առաջատար մասնագետների խորհրդատվությունը,
• ներկայացնելու իրականությունից բխող խնդիրների իրենց լուծումները՝ ի ցույց դնելով մասնագիտական կարողություններն ու ներուժը։
Կիսաեզրափակիչում առանցքային են դառնում գիտական մարտերը, որտեղ հավասարապես որոշիչ են թե՛ թիմային մարտավարությունները, թե՛ մասնակիցների անհատական որակները՝ զեկուցողի, ընդդիմախոսի, գրախոսի և դիտորդի դերերում։ Եզրափակիչը հարթակ է սեփական նախագծային աշխատանքները ներկայացնելու հնարավորությամբ։ Մասնակից թիմերն ազատ են որոշելու իրենց հետազոտության ծավալը և բնույթը։
Յուրաքանչյուր տարի մրցաշարն ունենում է իր թեմատիկ ուղղվածությունը՝ ռազմականից մինչև էկոլոգիական։
Մրցաշարի գլխավոր ձեռքբերումը երիտասարդ և փորձառու գիտնականների, ինչպես նաև գիտական և հարակից ոլորտներում գործող կառույցների համախմբումն է գիտության զարգացման շուրջ։ Արդյունքում ունենք համագործակցության նոր մշակույթ և գիտական ուժեղ համայնք։
Բնագիտության ուսանողական առաջին մրցաշարն ունեցել է՝
• 4 թիմ,
• 20 մասնակից ուսանող (հանրապետության տարբեր բուհերից),
• բնագիտական ոլորտի 22 առաջատար մասնագետ ՀՀ-ից և արտերկրից՝ իբրև ժյուրիի անդամ։
Մրցաշարին զուգահեռ՝ մասնագիտական համայնքը միավորելու, գործատուներին ներգրավելու և մրցույթի օրը իսկական գիտատոնի վերածելու նպատակով կայացել է «Գիտության ԲՈՒՄերանգ» խորագրով ցուցահանդես։ Մասնակցել են գիտական և հարակից ոլորտների 8 ընկերություններ։
