«Այբ» հիբրիդային կրթությունը նորարարական հարթակ է, որի նպատակն է լավագույն կրթությունը հասանելի դարձնել բոլորին: Ժամանակակից տեխնոլոգիաների, նորագույն մեթոդաբանության և ցանցային լուծումների կիրառմամբ այս ծրագիրը սովորողներին առաջարկում է միջազգային ճանաչում ունեցող Արարատյան բակալավրիատի վրա հիմնված մրցունակ կրթություն։ Ծրագիրը նախատեսված է 7-11-րդ դասարաններում և ավագ դպրոցում սովորող պատանիների համար և ամբողջությամբ անվճար է։
«Այբ» հիբրիդային կրթությունը նախագծային կրթություն է, իսկ վերջինս համարվում է աշխարհում լավագույն կրթական մոդելներից մեկը։ «Այբ»-ը նախագծային ուսուցման բացառիկ փորձ ունի։ 2015 թվականից այն մեծ արդյունավետությամբ կիրառվում է «Այբ» դպրոցում և հասցրել է ստեղծել այնպիսի նախագծեր, որոնք հաջողությունների են հասել կրթական տարբեր հարթակներում։ Այժմ նախագծային կրթությունը «Այբ հիբրիդային կրթություն» ծրագրի առանցքային բաղադրիչներից մեկն է: Եվ ծրագրի մասնակիցները, հիմնավոր գիտելիքներ ձեռք բերելուց բացի, կարողանալու են բացել աշխարհի լավագույն համալսարանների դռները և աշխատանքի անցնել առաջատար գործատուների մոտ:
Ծրագրի առաջին փուլին մասնակցել են 66-ից ավելի պատանիներ Արցախից, Հայաստանի գրեթե բոլոր մարզերից և մայրաքաղաք Երևանից։
Ձևավորվել են 11 նախագծային թիմեր՝ իրենց ոլորտներում հայտնի մասնագետների ղեկավարությամբ։
