«Այբ» հիբրիդային կրթությունը միջազգայնորեն մրցունակ և համապարփակ կրթական մոդել է՝ հիմնված «Արարատյան բակալավրիատ» (ԱԲ) ծրագրի վրա։ Ծրագիրը նախատեսված է Հայաստանի Հանրապետության և Արցախի հանրակրթական դպրոցների (ինչպես նաև քոլեջների և ուսումնարանների) 10-րդ դասարանցիների համար։

Ծրագրի առաջին շրջափուլին մասնակցում է 66 աշակերտ՝ Հայաստանի Հանրապետության բոլոր մարզերից և Արցախից։

Իսկ թե ինչ կտա Ձեզ հիբրիդային կրթությունը կարող եք իմանալ՝ լսելով մեր նախագծավարներին, սեփական նախագծերը մշակած սովորողներին և առաջատար մասնագետներին։ Տեսաշարը՝ նկարում։ 

«Այբ» հիբրիդային կրթությունը դառնալու է հաջողության այն բանալին, որով աշակերտները կարող են բացել լավագույն համալսարանների դռները և աշխատանքի անցնել լավագույն գործատուների մոտ։ Ծրագիրը կազմված է հետևյալ բաղադրիչներից՝

- բնագիտամաթեմատիկական ոլորտում կիրառական կամ հետազոտական նախագծի իրականացում՝ թիմերով

- մաթեմատիկա, ֆիզիկա, քիմիա, կենսաբանություն և ՏՀՏ առարկաներից որևէ մեկի (աշակերտի ընտրությամբ) դասընթաց՝ միջազգային ճանաչում ունեցող քննություն հանձնելու հնարավորությամբ

- «Ստեղծարար մտածողություն, նախագծերի կառավարում և հետազոտական հմտություններ» դասընթաց

- դասախոսություն-հանդիպումներ հեղինակավոր խոսնակների հետ

- «Ինքնություն և արժեքներ» դասընթաց

- մասնագիտական կողմնորոշման հանդիպումներ և այցեր

- համայնքային հավաքներ ու քննարկումներ

«Այբ» հիբրիդային կրթությունը նախագծային կրթություն է, որը համարվում է աշխարհում լավագույն կրթական մոդելներից մեկը։ Նշենք, որ այս կրթությունը չի փոխարինելու դպրոցական ծրագիրը, այլ լրացնելու է այն։

Ծրագրի նպատակներից մեկն աշակերտին օգնելն է մասնագիտական կողմնորոշման հարցում։

Դասաժամերը նախագծված են այնպես, որ չեն համընկնում հիմնական դպրոցական կրթության ժամերի հետ։ Աշակերտի շաբաթական զբաղվածությունը 10 ժամ է։